YE NUESTRA

Ensin tenete en cuenta llevámoste dientro, vivímos col orgullu de lo que ye nuestru. Una ayalga gastada de tantu mirala y d´emporcala, dexar que baxe lo que tiramos cola riada ensin da-y la importancia. Sufridora invisible, callada y delicada. Requexu de páxaros migrantes, de fotógrafos escondiellaos, de ribereños agüeyadores mientres remanez el silenciu, acomuñadores de sentimientu. Rescampla orgullosa acariñada pel sol mentantu baxa sele la marea, con basoria a esgaya. Cuerre´l golor qu´alienda ún cola esmucidora piragua y, mécese col arume del zusmiu la mazana.

La nuestra señora, la ría que fai a la Villa hermosa, ye una flor nel xardín, un cuadru na paré y un previlexu pa los sentíos. Tan viva, tan rica, tan guapa, tan galana y pocu curiada..., nun podemos con élli, cola so paz atristallada, cuando fuyen les llárimes polo que-y damos, que mos sobra... coles mancadures nes escoyeres, qu´enfotada ta colos colladores nes sos venes.

Da-y espeyu al cielu, a les ñubes y al vientu y tamién a la contorna que l´adorna.

La barra nun ta pesllada, díes d´orbayu, de borrín y vientón, cada marea ye un sospirín de rexeneración.

Equí ta la Reina´l Conceyu, nel so espaciu de silenciu, cuando namás la mira la lluna y entra pela barra la borrina.

XUAN MIYAR

NEL GÜEVU

Equí toi, rescamplando, afitáu na parede pero naide repara en min, confórmome con mirar la fonte, arroncháu, de frente, acariñáu namás pol vientu, alendando ignorancia nesti puntu d´alcuentru guapu p´aselar. Xúbeme la carga emocional de conocer onde toi, mirando la xente cruciar la placina, encandilaos, colos güeyos risueños sabiendo que tan nel so cielu, tando na Villa hai qu´andar orgullosos y presumiendo pel Güevu y mirando cómo s´esmenen les banderes de la Casa´l Conceyu.

Pela sienda d´una tardi perdía, coles dos cabeces que me llantaron en piedra duro, dame l´aire que m´avera ilusión fondera, naguando polos colores de claveles, música de gaites y d´un golor que vien del Royalty a calamares fritos, remembrando décades pasaes y alguardando les futures. Llugar d´alcuentros ocasionales, afectuosos y otros, a güeltes inoportunos, xuegos de neños pasando les tardes, enriedando y coles madres aldericando y l´andar seguru y a veces esmoleciu de persones al rodiu del Ayuntamientu.

Ráspienme les miraes dacuando la xente güeya´l reló, cuantayá cola campana muda nel campanariu qu´adorna l´olvidu. Con dignidá, miro col güeyu de la cabeza de la izquierda les moces y mozos d´esos bailles de los domingos, dalgún concursu de bolos y cantares de tonada y de la reciella xugando y, un día de cutu, alguardando emocionaos polos chochos que-yos tiren, un 5 de xineru.

Col güeyu de la cabeza derecha, miro la mocina xunto´l carrín de los xelos, la mio cómplice, trabayadora callada, dende tiempos de la carroza d´aquella manzanona, cavilga y cavilga los mesmos pensamientos, estremando la rellación d´époques en blancu y prietu y remembrando los fechos que nun coesistieren nel mesmu tiempu. Díes grandes p´arrodiar el pilón col grupu la Danza y, pela tardi, ve separtase la xente col rictus roceanu, dexando pasar les autoridaes bien enchipaes, pa entrar na Casa´l Conceyu. Con traxes d´asturianu, ente cures y autoridaes, enfotaos, los mozos entamanen el llagar, el duernu y los mayos. Va alterándose la mocedá, mozos y moces mírense de regüeyu, va comecipiar la romería, entama´l baille y saquen a baillar aquella neña vergoñosa, que ta colos padres, dixo que non, dio-y cosa.

Atapeció enforma, coles lluces de colores, tirando pel carrín, la mocina los xelos mírame de regüeyu, cola mirada no altu, despídese del escudín hasta mañana. Pel Ancho alcuentra pasiando delles pareyes, anden hasta la Manzanera, dempués dalgunes tiren pa Les Caleyes, otres pa enriba la Ballera.

Miráime, miráime siempre, soi l´escudu l´Ayuntamientu, xixilante u ignoráu, pa los gurriones el so posaderu. Toi coles ales enquilosaes y les garres afilaes, fáltame la fonte´l pilón, el carrín del xelu, una mirada descarada y que, con un chorrín d´arena me llaven la cara. Soi´l guardián del vuesu espaciu de postín y melgueru, testigu de la hestoria metía en vena nel corazón del mio pueblu.

A bocanaes d´aliendu manen los suaños de la hestoria repetía, caltengo la memoria en caxa de piedra llabrada y el carazón d´arenisca, bien tallada.

XUAN MIYAR

LES CALEYES

Entró nel campu cola entrada d´unes poques pesetes y metióla nel bolsu con perres sueltes, Ramón va gastales pa comprar unes tires de la rifa. El campu ta bien moyáu como siempres n´iviernu, los xugadores patexen el prau quitáu al porréu cola folla de la muga acabante cayer, enterrando les botes hasta los todiellos, nun ensucha, nin van sintir el golor a pación acabante segar hasta que nazcan les margarites.

Caúna de les pataes p´alantre ruxe un sentimientu de pasión cola priesa d´algamar dalguna allegría que precisa nesta categoría nun furacu del infiernu. Un pensamientu raspiáu allegró la tardi col primer gol de Miguelín, emperu hai pocu enfotu escontra los lleñeros armeros del Juvencia duros de royer, nun taben vencíos entá, de sópitu, apágase la lluz qu´allumbraba la ilusión. Torna del campu palmando´l partido y tamién la rifa. Cola cara llarga, comu tolos aficionaos y comu la de munchos domingos nes nuestres lligues cuasi escaecíes, la de munchos paisanos yá vieyos que remembren a Robledo, a Muslera y Palenzuela, tamién al Filipu, hai, ensin él, en cuántos partidos yos metín un galipu. Siéntelos falar d´éllos y de tantos xugadores lleales que lo dieren tou pol equipín de la Villa, falaben de cuando yeren neños, dacuando pa entrar nes Caleyes cuntaben en riales les pesetes.

Güei tampocu fueren quién, col balón mui pesáu, les botes entremeraes fundiendo´l calcañu pa dar un pilancu y dexar ehí´l balón, mientres los aficionaos amuesen la fuercia d´impulsu verdaderu a la solombra de les vieyes fileres de murnios cipreses.

Solombra zarrada na valla ensin xente, ellí ta Ramón, a les cuatro del domingu torna´l xuegu pal aficionáu caseru. Camiseta negra y calzón per un minutu blancu entama´l xuegu, los ñeños a la gueta´l balón, ¿ónde coló?, colgáu del ciprés o n´otru llau dientro´l charcón.

Llealtá, ye´l palpu nes cais de la Villa, ye´l gabitu pa conocemos y queremos como sufridores ensin copes nin campeonatos, el premiu ye´l purgatoriu, baxar y xubir la pasera pa llegar al premiu, salir del infiernu.

Vamos enriba mozos, xube Senín y Anzarda cambiáu de banda, centra cola mala pata, entra Enrique con tou, que la remata.

Rescampla´l sol penriba la valla, semos importantes na categoría nacional, el rival ye un equipu de capital que llega a la Villa dándose méritu, xube l´espiritu, polos goles que metimos y nun mos metieren, calientes salieren.

Ramón, un paisanu yá vieyu ta na grada a la bocana, cuntando-y a un ñeñu hestories d´aquellos tiempos, cuando sudábamos enforma pa ganar un partido o mos metín goles pa un caxón, entós nun teníamos a Porrón. Ramón cuénta-ylo argullosu, alcordándose d´aquella muyer que tantu glayaba y, afalaba al llinier col picu´l paragües, ésti corría per dientro les rayes faciendo esparabanes y, al que-y glayaba: “Una fesoria ye lo que me faltaba”.

Alguardaos del orbayu y del sol, atechaos na grada, cantamos goles d´emoción que mos avera a los suaños pa beber de la nuestra fonte d´ilusión, pola bona xestión y tar ufanos ya invatíos nesi luxu de campu, col calzón munchu tiempu blancu.

¿Ónde tan los Lleales?, onde ta Ramón, na so soñada, onde tan les alcordances de la torna´l purgatoriu, con dignidá bien puestu nel suelu, viaxando nun xergón de ñubes penriba Les Caleyes, nel llímpiu cielu.

XUAN MIYAR